Mo Motswasele II, terama ya ntlha e e ikaegileng ka ditiragalo tsa hisetori e kwadilwe ke Motswana, e e phasaladitsweng ke Bantu (moragonyana African) Treasury Series ya University of the Witwatersrand Press, ka 1945, Leetile Disang Raditladi o sekaseka bogosi le gore maikarabelo a kgosi ke eng ka baanelwa ba babedi ba ba maatla, Moruakgomo le Motswasele. Go ya ka hisetori ya Bakwena, bobedi joo e ne e le baba ba lwela bogosi.
Raditladi o kgala mokgwa wa puso wa ga Motswasele, yo o busang ka letsogo la tshipi, a itseela dikgomo tsa batho ba gagwe mme lefoko la gagwe e le la bofelo. Motswasele o itikagantse ka batho ba ba sa tshepagaleng e bile ba sa itse sepe ka boeteledipele kgotsa sepe se se tsamaelanang le bogosi. Moruakgomo, ka fa go je lengwe, o tlhagelela e le moetapele yo o pelo, wa segatlhamelamasisi, yo o botlhale, yo o ponelopele e bile a kgona go reetsa fa a gakololwa.
Mo terameng, Raditladi o lemosa kgosi go se kgopise batho ba e tlaa tsogang e ba tlhoka kamoso, le go se letle dikoma tse a di iteelwang go mo ya tlhogong le go mo tlatsa maikgogomoso. Motswasele II e fatlhosa babuisi ka ga botlhokwa jwa setheo sa bogosi, le tlhokego ya kgosi go busa ka botlhale le go rarabolola dikgotlang fa di runya.

Circa l’autore