‘Giacumbert Nau’ ei in roman pastoral senza idilla. Siu letg ei memia cuorts, il dutg ha buca piogn e Giacumbert staupa la finiastra cun plastic – smaledescha vischnaunca e purs. Giacumbert selegra dalla prozessiun dallas nuorsas e smarveglia ch’ils carstgauns van el trot sco las nuorsas. Giacumbert ha bugen la natira – il Coroi cumadeivel e consolont ed ils dutgs che ramuran. Ed el ha da batter cun ella.
In urezi furiescha el grep. Ella brentina dalla Greina cumparan nauschs maletgs.
Giacumbert ei isolaus e stinaus. Pertgira ils tiers e carsina siu tgaun, la perderta Diabola. Regurdientschas d’Albertina cun sia odur da safrauna stgir-melna mudregian el. Ella cun sia pial petra sco il sal dalla tiara – ch’ha maridau in auter.
‘Giacumbert Nau’ ei in cudisch plein poesia e forza, gretta ed affecziun – ed ina canzun alla carezia denter Giacumbert ed Albertina.
Circa l’autore
Leo Tuor (naschius 1959) ei carschius si a Rabius e Mustér, nua ch’el ha absolviu il gimnasi. Silsuenter ha el studegiau filosofia, historia e litteratura a Turitg, Fribourg e Berlin. Duront ses studis eis el staus redactur dalla gasetta da students ‘la Talina’. Leo Tuor scriva raquents, essays, columnas e contribuziuns per gasettas, organs ed antologias. Ultra da quei lavura el per radio romontsch. Sia ovra litterara principala ei la trilogia sursilvana Giacumbert Nau (1988), Onna Maria Tumera (2002) e Settembrini (2006). Leo Tuor ha retschiert differents premis e viva cun sia familia a Val/Surrein.
Altri ebook dello stesso autore / Editore
773.871 Ebook in questa categoria
